一人有一個夢想，你想起座樓佢想開餐廳，人人唔同。李白、馬騮的夢想？發明一個附有太陽能板的行山背囊，你就可以一邊行山一邊為手機（尿袋、平板、芭蕉扇）叉電。
李白讀產品設計，馬騮讀紡織，兩個好朋友喜歡行山，喜歡露營。現代行山，越來越多電子裝備，樣樣都要電，對「尿袋」需求非常大。他倆有日忽發奇想，如果帶塊太陽能板，可以一邊行山曬太陽一邊為「尿袋」叉電，就唔怕無電，又不用隨身帶幾個「尿袋」，可以循環再用。左度右度，行山露營一定要帶大背囊，不如就太陽能板加行山背囊，唔使唱歌跳舞，一樣有得諗！面前這個Apollo 45L，應運而生。
諗完又停，停完又諗，設計完一個又一個，斷斷續續幾個月過去，終於設計出自己的心水作品。要有型，所以用黑白色作主調，要耐用，用了一種德國出產的物料X-Pac，物料本身用來做出海帆船的帆布，防水、輕量、抗撕裂。內籠Dry bag的設計，分隔不同用品。而大大塊的太陽能板，到底叉到幾多電？測試當天有點陰，大約一分鐘叉到1%，如果天氣晴朗效率會更好。
兩個後生仔，喜歡設計的原因很簡單，認為把紙上的設計化做實物，當中滿足感難以言傳。他們把設計放上indiegogo，希望集到足夠資金，將產品量產。成功？失敗？未知之數。問到如果籌不到足夠資金，會不會繼續堅持，會不會有下個產品？李白說：「應該會試到自己攰，可能就會停一停，但應該都唔會停。」如果覺得個背囊尚算有型實用，可以上網支持一下。你我都年輕過，老土一句，年輕唔追夢，等幾時？
記者：李聰
