上星期六在沙田馬場，遇到不少相熟朋友，一入馬場等𨋢，跟住後面嘅竟然就係「劍飛聲」、「劍斷浪」嘅馬主團體主要成員Hugo與Fione，左丁山家人以前同佢地一齊養過「華劍寶」，隻馬在徐雨石馬房贏咗四場之後，降到第五班，多位團體成員認為隻馬已經用盡，2010年馬季後，建議將隻馬退役，唯獨是Hugo獨排眾議，唔肯，將隻馬轉往苗禮德馬房，喺2011/12年新馬季第一次出賽，即勝出泥地千二，我地為之目瞪口呆，之後再贏多三場先至退役，證明Hugo養馬有眼光又有運氣，六年來見佢與Fione每星期在馬場出雙入對，一齊拉頭馬，好不快活。唔，拉得頭馬多，兩人卒之要拉埋天窗嘞，呢日Hugo話佢與Fione決定結婚，八月中在四季酒店請飲結婚酒，真係恭喜晒佢兩位，祝呢雙戀人成為正式夫婦之後，拉頭馬次數起碼倍增。
就快散場之時，四位經濟分析師竟然同時出現，罕見也。左丁山見到首席男經濟師L在身邊行過，連忙嗌住。原來佢係由經濟師M帶來馬場觀光嘅，同行者還有女經濟師C，與女經濟師T，四位已經退休，大把空閒時間，故此嚟馬場玩吓。T女士嘅先夫係著名經濟學家，逝世後，T女士亦自銀行提早退休，M女士則到退休之齡，為銀行處理雷曼爆煲餘波好幾年，解決後先至退休，呢日見佢精神活潑，健康似勝往昔，可能真係退休後夠時間養生之功。M女士話：「左丁山，我退休後檢查身體，方知執番條命，呢兩年做咗五條血管通波仔手術呀！我係真正雷曼苦主！」好彩風潮最盛時冇爆血管啫，睇佢𠵱家神采飛揚嘅面容，人係要知道甚麼時候急流勇退嘅。首席男經濟師L就聽講用不少時間進修神學，滿頭白髮，相貌慈祥，成個牧師咁款！問佢地有冇贏錢，大家一齊答：冇乜，來馬場志在食嘢睇馬，當係娛樂活動啫，大家傾吓傾吓。從女洗手間走出嚟嘅，係女經濟師C，又係自中環退隱之人，佢以前以研究中國經濟為主，香港經濟為副，呢日竟然贏錢贏到笑㗎㗎。佢話第8場有隻後備馬補出，就係7號「宅大大」（11倍），呢場大熱門係田北俊議員嘅4號「人民武士」（2.1倍），佢心諗張德江即將訪港梗係以大為先，田議員要暫時退避，而邊個最大？當然係「宅大大」，單Q加隻有往績可尋嘅47倍冷門9號「精算追擊」，於是買30元單Q 7、9，「宅大大」拖「精算追擊」，咁就30元收番9228元，笑到幾乎儍咗！呢隻「宅大大」以後當佢係習大大咁追可也！