台灣總統蔡英文噚日正式宣誓就職，台灣第一位民選女總統上任，歷史時刻自然吸引唔少人關注。
估唔到身處議事堂嘅財經事務及庫務局局長陳家強，都偷雞睇埋一份，仲睇得津津有味！
「唔知點答你」
立法會噚日辯論修訂強積金計劃嘅法例，身為負責官員嘅陳家強梗要乖乖留守會議廳啦。不過八方發現佢好專心……好專心望住個芒睇蔡英文就職演說，足足睇咗半個鐘有多。
其實陳家強仲有另一身份，就係港台經濟文化合作協進會理事及副主席，所以關注台灣時政合情合理，但當八方問到佢時，佢竟然避忌話：「咁嘅問題唔知點答你喎。」
八方明白北京對民進黨小英唔多友善，陳家強唔知係咪因為咁而唔敢答，不過民主黨單仲偕話之你，喺fb po咗兩張分別攝於2005年、2011年同蔡英文嘅合照，轉眼十年有多，一個上位做總統，一個就金盆洗手退出立會！不過單雞就覺得蔡英文篇演說只係「高大空」，小英𠵱家同台灣人民嘅百日蜜月期轉眼就過，到時先見真章呀！
而香港政界女強人、新民黨葉劉淑儀都睇晒小英成個演說，講到政治正唔正確呢，佢當然話蔡英文唔正確，但佢話小英勇於承認問題值得學習，而且都仲算講得出個願景。
李八方
mailto:[email protected]