林芊妤（Coffee）作為專業瑜伽導師，金雞獨立、拱橋、一字馬等動作絕對難不到她，但對於初次接觸的火辣鋼管舞（Pole dance）、還要穿上8吋高踭鞋在鋼管上攀高攀低擺出優美動作，甚至要倒吊，讓Coffee大叫辛苦，最後她花了兩小時隨導師Tiffany上速成班，雖然雙腳多處撞傷變瘀黑，但被導師讚她成績超班，Coffee亦說好值得！
採訪：草津
林芊妤承認之前沒有細想過鋼管舞有多難，還以為自己有瑜伽底子會較易上手，到真正跳才了解瑜伽和鋼管舞大不同：「鋼管舞同做瑜伽都要用力，但用嘅力係唔同，瑜伽動作係用力推出去，鋼管舞就啱啱相反，係要用力拉埋嚟去支撐自己身體，基本上少啲臂力都做唔到，同埋初學一定會撞瘀晒。」
冇得護膚
鋼管舞導師Tiffany指一般學生會花7星期學一首歌，初班由基本動作Fireman開始做起，而Coffee的速成班已包括一般學生第7個星期學的動作，故Coffee雖不算純熟，但已經可以做到sit、outside leg hang、tuck等動作已經好叻，相當有潛質。
Coffee笑言：「雖然今次着嘅衫未必係最合規格，但係都照足導師指引，之前一晚手腳都沒有塗潤膚霜，因為導師話跳鋼管舞要盡量令身體黐得實鋼管，呢啲導師唔講真係唔會注意。」
撞瘀扁嘴
由於Coffee之前完全沒有接觸過鋼管舞，導師第一個動作教她如何攀上鋼管，以為輕而易舉的Coffee用力一跳即痛極尖叫，原來她用雙腿夾鋼管時撞到小腿內側，痛到瞇晒眼的Coffee扁晒嘴說：「瘀咗喇！真係好痛，即刻瘀晒，有啲頭暈，可唔可以走先？」Coffee又笑指自己只是地上最強，但離地的動作對她來說很有難度，終在導師悉心教導下，由基本的Fireman做起，再學轉圈及倒轉。
原來Coffee早有學鋼管舞的念頭：「之前一直都喺度諗學瑜伽好定鋼管舞，但嗰時我仲喺電視台，好多時都好大壓力，完全瞓唔到覺，有朋友提議我揀瑜伽，可以幫到我平復到自己，心靈平靜啲，將所有嘢都放慢啲，所以最後我揀咗學瑜伽。」Coffee又指現在台灣好流行將瑜伽融入鋼管舞，她對這方面很有興趣：「我會開始喺呢方面研究多啲，一來有興趣，二來想多學一技旁身。」
場地提供：Melody Pole Studio
導師：Tiffany
