法蘭克福隊長馬高盧斯（右）日前藥檢肥佬，事後證實唔係食咗禁藥，而係患癌所致，情況仲幾嚴重。雖然係咁，佢仲堅持喺前晚場德甲附首回合上陣，可惜幫唔到隊波贏波，只能逼和來訪嘅德乙季軍紐倫堡1:1。法蘭克福隨後證實，因為停賽而踢唔到下周一次回合嘅馬高盧斯將會喺下星期接受手術。馬高盧斯藥檢肥佬後，有關方面勞師動眾去佢屋企同球會搜查，法蘭克福認為對方冇查清楚就咁做，會採取法律行動，幫馬高盧斯攞番個公道。