被形容為「西環契仔」嘅立法會議員謝偉俊（Paul），早排喺九龍東掛出「香港須改 特首要變」橫額，但隨後疑因受壓，橫額全部被消失。
阿Paul噚日就喺facebook上載一幅相（圖），話見到傘兵組織「東九龍關注組」最近推出咗一款寫有「香港須改 特首要變」橫額，仲寫明「無懼壓力，唔會換走banner！」阿Paul hashtag咗「Design都學埋真係好嘢」、「我個心好苦」、「但係我唔講得」。
阿Paul仲同八方講，對呢班後生仔「二次創作」令佢幅橫額重見天日覺得好開心，話明唔會投訴對方抄襲。佢又話，之前掛橫額後，唔少地區樁腳同街坊覺得「特首要變」走得太前，話阿Paul選民入面好多真係愛國愛港人士，覺得咁做難以解釋，惟有暫時收起廿幾幅有關橫額。