八方之前寫過，體育、演藝、文化及出版界立法會議員馬逢國喺立會行政管理委員會閉門會議入面，話記者喺會議廳外食飯唔衞生唔好睇，又話要搬走會議廳外「咪兜」，結果俾好多人鬧爆，連建制派嘅立會議員都唔幫佢。
當年有份搞新立會大樓嘅立會前秘書長吳文華（圖）噚日接受電台訪問，話昔日喺走廊設凳其實係方便記者等議員做訪問，後來因為越等越耐，有記者話要用電腦做嘢同食飯，經行管會討論後決定加枱、飲水機同電視等，當時議員、記者都有默契，容許喺該處食嘢，但要食快啲，清潔人員亦會配合。
而「咪兜」位置同樣係經議員、立會職員同記者多次討論嘅結果，換言之，馬議員投訴嘅事，其實係行管會決定，咁佢投訴之前，係咪應該睇番以前行管會文件先呢？