周四NBA東岸決賽，騎士憑勒邦占士（LeBron James）交出「大三元」，以108:89大勝速龍，總場數領先2:0，同時豪取季後賽開局10連勝；「大帝」今場更重演15年前「胯下之辱」嘅情境，幫恩師路爾（Tyronn Lue）出番口氣！
騎士屠「龍」季後賽10連勝
占士今場交出23分11助攻11籃板，令佢喺季後賽累積射入5,255分，以五分之差力壓奧尼爾（Shaquille O'Neal）升上季後賽得分榜第四位。騎士以19分大勝速龍，亦成為繼1988/89、2000/01球季嘅湖人，以及2011/12球季嘅馬刺後，史上第四隊喺季後賽開局10連勝嘅球隊；假如佢哋再贏一場，好似湖人咁攞到11連勝，贏得隊史首個總冠軍嘅機會就更大！
騎士喺季後賽連贏10場，亦令季中走馬上任嘅教練路爾力壓萊利（Pat Riley），成為執教首季攞到最多季後賽連勝場數嘅教練。雖然路爾嘅執教戰績唔錯，但唔少球迷對佢嘅印象停留喺00/01球季總決賽俾艾華遜（Allen Iverson）檻過嘅一幕；唔知「大帝」係咪想幫恩師洗刷恥辱，第一節上籃後無視倒地嘅史高拉（Luis Scola），直接喺後者頭上檻過，重演15年前嘅「胯下之辱」，霸氣盡現！
