費達拿喺周四宣佈因背傷退出法網，消息簡直令網壇震驚！因為呢位34歲瑞士網球手自1999年美網之後，從來未試過缺席大滿貫賽事，呢次退賽亦令佢連續65次出戰大滿貫正賽嘅紀錄告終；佢嘅同胞、上屆法網冠軍華域加都話難以置信。不過，費達拿就同粉絲大派定心丸，話自己短期內都唔會退休，仲會努力爭取喺下月溫網復出㖭。另外，法網男單周五抽籤，祖高域同拿度有可能喺四強相遇。