教育屆立法會議席泛民一直袋到實，前兩屆有親建制嘅教評會落場都無功而還。不過嚟緊9月選舉可能再有建制團體挑戰喎，今次輪到教聯會副主席蔡若蓮（圖）。蔡若蓮係福建中學（小西灣）校長，佢話會以獨立身份參選，少啲包袱，唔知係咪想搣甩建制形象? 佢喺教聯會傳媒茶敍宣佈消息，仲話成日聽到老師話「冇得揀」，TSA爭議又俾人政治化，所以挺身而出畀多個選擇大家，但佢話「唔係匹夫之勇」，要等埋6月尾，睇埋教聯會收番問卷，睇吓會員係咪支持先決定喎。
蔡校長話自己係「中間」派，冇既定政治立場，仲話自己單純，弱點係唔曉做騷，豁出去參選同跳海差唔多喎。提到教協派葉建源出選，蔡校長話對方係「好有經驗搞政治嘅人」，但自己勝在比較有溫度同感情。提到教育局局長吳克儉，蔡校長忍唔住話「睇唔到有乜理由佢要做多屆」。