有「真‧兄弟」徐遠成同徐遠征在陣嘅永倫，噚晚喺修頓上演嘅甲一聯賽迎戰力爭季後賽一席位嘅福建，首節就憑住中鋒黃鎮煒轟入三個三分波，領先福建七分；佢哋第二節開始打出16:0攻勢，領先48:36完半場；上場「地標戰」對飛鷹有六分貢獻嘅徐遠征，今場只係得七分，但有「得分機器」泰那喺第三節狂轟16分兼得全場最高21分，最後永倫輕鬆贏93:58取得六連勝，將喺常規賽煞科日大戰南華。
至於有洋將班尼斯復操嘅東方，頭場迎戰聯賽仲未開齋嘅晉龍，雖然未傷癒嘅班尼斯冇落場，但憑住方誠義「爆seed」取得全場最高28分同16個籃板，幫東方以92:79擊敗晉龍。