人稱「飛天朱」嘅前港區人大代表朱幼麟（圖），早排不斷狙擊特首梁振英涉濫用特權嘅「行李門」事件，踢爆梁特喺事件中施壓整喊航空公司職員，又批評梁及一啲愛國人士，為私利而討好中央損害香港。噚晚飛天朱應同樣係電單車發燒友嘅錢志健邀請，同「2047香港監察」成員分享對「行李門」睇法。飛天朱同八方透露，剛於下晝同機場職員開會一小時跟進「行李門」事件，「我講咗追究到底，就唔會放手，你哋放心」，仲話真相遲早會出來。飛天朱又話，雖然佢已好努力嘗試，但至今未接觸到涉事機場職員，正正反映有人想掩蓋今次件事，又表明嚟緊會繼續爭取同有關人士接觸，相信涉事最少四、五個人，有機會梁振英今屆特首任期結束前就會成事。
飛天朱又分析，全國人大常委會委員長張德江最近訪港嘅講話，對梁振英爭取連任有好大嘅間接影響，而張強調一國兩制嘅「初心」，同梁振英做特首後，不斷破壞香港核心價值嘅做法係完全唔同喎。