相信大家最近打開面書，都俾黎天王嘅咖啡廣告洗晒版，佢推介隻咖啡真係賣到斷市，真係唔服互聯網威力都唔得。皇家馬德里嘅前鋒基斯坦奴朗拿度（C朗）粉絲遍佈全球，威力就更加勁啦。C朗嘅面書、twitter同instagram個人戶口，已經突破兩億追隨者（上圖），遠勝宿敵美斯嘅1.2億，當中twitter就有4,000幾萬，之前佢幫南韓一間手機商出一條twitter，就可以收20萬歐元（約174萬港元），多過唔少香港人成年人工。
論人氣，皇馬可能高過巴塞，但球場成就就似乎巴塞高啲啲，巴塞拎到西甲冠軍之餘，亦壓過皇馬成今季西甲公平競技第一位，而巴西前鋒尼馬有傳獲曼聯、車路士等球隊招手，巴塞就向尼馬提出續約六年至2022年嘅新約，違約金高達2.2億歐元，希望綁住尼馬（下圖）。