中銀航空租賃（2588）開始招股。以業務性質嚟講，航空租賃公司買飛機再租畀航空公司，購買飛機時已一口氣同航空公司鎖定多年租賃合約，理論上呢盤生意係穩賺，但回報期又長，又重資產，所以喺低息周期下，以高槓桿去經營呢盤生意係常態。中銀航空租賃嘅淨資產負債比率相對中國飛機租賃（1848）為低，相對中國飛機租賃更具持有價值，市盈率12.3倍至15.5倍，講真唔算貴。不過，似乎有更好選擇咁解。
近年甚少聽到航空公司要大手買飛機，原因係航空公司向飛機租賃公司租飛機成為大趨勢，好處係令航空公司由重資產變成輕資產，加強競爭力同經營靈活性，但你以為航空股會成為大贏家？原來唔係，因為飛機租賃嘅出現，令到航空企業嘅經營門檻大大降低，形成廉航等等低成本航空公司衝入市場鬥平鬥賤，你睇國泰（293）股價就知有幾慘。
呢種大趨勢令到人人可以搭飛機，航空生意變咗密食當三番，機場股本來有前景，奈何重資產制約增長。仲有乜公司可以輕資產得嚟受惠呢個趨勢？第一隻係美國上市估值貴到嘔嘅Ctrip攜程網，但盈利前景不得了；另一隻係中航信（696），篇幅有限，呢兩隻股嚟緊慢慢講。
晉佳
http://www.facebook.com/advanceguy1