中國「權威人士」拋出「L型經濟論」後， 又有唔少人討論「中國會否重蹈日本覆轍」。
日本嘅覆轍，指「迷失廿年」，由90年代初打後的廿年，年均實質GDP增速1%都無。論GDP增速，確係好L型，但並非所有L型經濟都係重蹈日本覆轍。例如前晚利物浦踢歐霸盃決賽，下半場連失三球飲恨，令人諗起2005年歐聯決賽，利物浦下半場連追三球，反勝AC米蘭，但無人會話前晚嘅利記重蹈米蘭覆轍，因為利記只曾領先一球，未嘗領先三球嘅滋味。
強國目前確係有啲似80年代尾嘅日本，都係經濟高飛三十幾年後，到達「劉易斯拐點」，即係廉價勞動力見頂。加上滙率幾年間大幅升值，損害出口，結果央行放水救經濟，反而造成資產泡沫、債台高築。
分別係中國未富先衰，去年人均GDP僅得8,000美元，大概等於日本70年代尾。1990年日本泡沫爆破時，人均GDP已達2.5萬美元，廿年來經濟雖無寸進，但大部份日本人一直生活富裕。中國則貧富懸殊，1%人掌握全國41%財富，7,000萬人在貧窮線下，如果咁快淪為L型經濟，好難唔暴動。正如《經濟學人》所指，中國金融系統比當年日本更混亂，債務危機一旦爆發，隨時衰過日本。
笑笑生
mailto:[email protected]
本欄逢周五刊出