體育、演藝、文化及出版界立法會議員馬逢國之前話記者喺立法會會議廳外嘅工作枱開餐「唔健康、唔衞生、亦唔係好好睇」，好不幸喺𠵱家選舉制度下，八方同一眾行家冇票投畀佢，但尊貴嘅馬議員其實係所謂嘅業界代表，呢屆任期就完，八方唔見佢為記者爭取過乜嘢權益。
其實好多議員都睇唔過眼，不過大家同事一場唔好意思開口，但就有人以行動撐記者開餐。
經民聯林健鋒噚日買咗幾打蛋撻請記者食，八方問佢有好嘢食不如請埋馬議員？佢話買畀記者食，如果記者鍾意可以請任何人食喎。
立法會秘書長陳維安路過都拎件撻食，被問到怕唔怕唔衞生？陳話，最緊要有好嘢食。