港股處於失望期，成交少，市場參與者唔多，九成人睇熊市，從中港基本因素睇，走唔甩經濟長期低迷，股市只容許長期低估值，指數低位上上落落，有危機又會大插。雖環球經濟麻麻，但科網、創新行業明顯跑贏傳統股，撇除騰訊（700），科通芯城（400）以至網龍（777）並非處於跌勢，可見有概念嘅公司，生存喺另一個世界。
上市公司中太少好嘢，冇華為、冇陸金所（平保之內）、冇螞蟻金服、冇維港投資…不能盡錄，中港股同美股分別，正正係優質股喺上市股份之中比例太低，人哋facebook、Paypal、Alphabet（即Google）喺美股都有上市，點比。
可見將來，肯定冇全面上升嘅歌仔唱，問題係美國嗰批強勢股，有冇本事帶領指數破頂創新高。係貴，但計估值最叻嘅畢菲特都keep住買嘢，即係話畀你聽，未貴到盡，有權再貴啲。
未來一年半載內樂觀的話，可有一個奇特劇本產生，類似1999年科網股熱潮，或2013年嘅濠賭科網股大牛市嘅升市。
如真咁好景，到時唔少香港投資者衝去買海外優質股，才是真見頂。若有真破頂，先吼facebook同Adidas。
晉佳
http://www.facebook.com/advanceguy1