【本報訊】鄰舍輔導會元朗幼兒園「爸爸」拐子佬事件，家長人心惶惶，提高警惕，避免小孩與陌生人接觸，校方昨再派通知提醒家長注意。而最近網上更有一段家長錄音，披露拐子佬埋手過程。
警聯絡目擊者跟進
《蘋果》昨再致電鄰舍輔導會元朗幼兒園查詢，職員聲稱事件已交由警方跟進，詳情不便透露。家長蕭先生表示，日前從妻子口中得知事件，「擔心，都唔知乜嘢人」，自己負責送兒子上學，妻子接放學，都格外小心留意，並提醒兒子「有陌生人拖就大聲叫」。另一家長劉太太稱，每天親自接送兩名子女，不太擔心，「作為媽媽，係唔會分神（令歹徒有機可乘）！」
此外，前日網上流出一段錄音中，有家長聲稱有一天早上送小朋友上學，見到一名操半鹹淡廣東話的男子，從後拖着小朋友，聲稱「爸爸送你返學啦！」帶小朋友返學的老婦大喝：「你係邊個呀」，對方只稱：「認錯人」，之後急步離去。亦有網民昨指前日在馬鞍山一間小學亦發生類似事件。
警方發言人稱，元朗警區已派人主動聯絡區內多間幼稚園負責人，他們均指未發現有疑似拐帶案，警方亦已主動接觸該名聲稱目擊拐帶案發生人士，冀能獲得更多相關資料以跟進。
■記者譚健文