噚日好多人排晒隊都買唔到黃子華舞台劇飛，下晝喺金鐘一間五星級酒店亦有條幾百人長龍，仲打晒蛇餅，唔知以為有飛派，查實佢哋係SOHO中國（410）小股東，排隊開股東會兼登記攞餅卡呀。反觀喺隔籬廳開股東會嘅騰訊（700）就得幾十名小股東，鬼咩，騰訊送招牌企鵝公仔咋。
SOHO中國呢次「餅卡之亂」，首先因為場地唔夠座位，現場只得200張凳，但就有700名股東現身，小股東焗住淨係攞張50蚊美心餅卡就走人。點知公司又一拖再拖，要佢哋成村人企晒喺度等，由2點等到3點40分，人潮先散晒。
雖然現場勁混亂，但董事長潘石屹就覺得小股東都好開心，似嚟開派對，攞餅卡亦好熱鬧，承諾以後會改善安排。
聞說SOHO噚日只係預咗300張餅卡，工作人員喺股東會前發現勢色唔對，已派人去中環買餅卡，點知因為封路塞車遲遲送唔到。有股東等得唔耐煩，登記資料就走，亦有人堅持留守。至於封路為誰人？大家明啦。