呢日坐的士過海到中環，在中環街市旁邊落車，的士司機可能好耐冇到過中環，竟然大驚小怪，對左丁山講：「乜呢座舊嘢仲未拆呀？」左丁山回答：「林鄭月娥做局長時話要保留，保育中環街市呀！」司機竟然破口大罵：「保鬼咩，中環街市爛熔熔，拆咗嚟重建，值幾多個億呀？政府直情係浪費納稅人金錢！」
掛住落車，都費事同佢再講落去，如果佢夠運載到一位保育團體人士，鬧大交都似。隔咗幾日，碰到一位有牌人士，講吓講吓，又講到中環最大之eyesore破舊中環街市。有牌人士問左丁山：「你從外面睇到之外，入過去未？」入去街市？好似最少係三十年前咯，現在中環街市內櫳如何，未見過，難以想像。
有牌人士話：「你最好唔入，入過去就會面青，以後唔敢再踏足。」即刻挑起好奇之心，追問個究竟。有牌人士話：「我前年因緣際會，掹車邊入去中環街市叫做巡視，唉，好彩係食飯之前，否則乜嘢都會嘔番出嚟。嗱，街市裏面最多兩樣動物，一樣就係白鴿，數以百計，我估可能有近一千隻，一飛撲起嚟，好有氣勢，我幾乎嚇到跌在地上，好彩冇跌，因為滿地白鴿屎尿，屎尿由磚牆滲透而下，臭不可擋。第二樣動物就係老鼠；老鼠通處走，幾大隻，恐怕放貓入去，貓都會俾老鼠圍攻而死。內櫳建築看似結構上比較脆弱，將來重建內部，穩定結構都好考工夫，機器在內運作太過有力嘅話，我驚會震冧一啲牆。」
左丁山聽到毛骨聳然，問一條外行人問題：「市建局未修補中環街市之前，叫食環署先去清洗乾淨，趕走白鴿兼滅鼠得唔得呀？」有牌人士話：「冇話唔得嘅，只怕到時老鼠走出電車路及大馬路，胡亂奔跑，嚇親中區儷人箒。但啲白鴿如何處理呢？中環邊度有地方容納近千隻污糟白鴿？全部殺晒呀？愛護動物人士一定遊行抗議。」唉，總之就係煩，有牌人士加多一句：「以我粗略估計，要清理清洗中環及鞏固街市內部，怕要億億聲！」駛唔駛呀？政府搞乜工程都億億聲，真係錢多得滯咩。由市建局負責，就更加難搞。特區政府回歸後，中環甲級寫字樓非常缺乏，租金高企不下，但政府任由貴重物業成為老鼠白鴿安居之所，浪費公眾資源，大概可以申請納入健力士世界紀錄大全。