90後，曾經何時被標籤為年輕一代，不過時至今日90後已經未必係後生仔，甚至連00後都出現喺球壇，英甲貝利月初就派00年3月出世嘅哥林史卡拉斯上陣，成為英格蘭職業球壇首位上陣嘅00年球員，蘇超冠軍些路迪仲誇張，周日煞科戰對馬瑟韋爾，同樣00年3月出世嘅艾捷臣後備入替，仲要幫球隊埋齋贏7:0，打破埋球會最年輕入球紀錄㖭。
不過咁，小時了了，大未必佳，近十幾年世界都出現過唔少足球神童，但又有幾多真係成名？最經典係美國神童艾度，14歲已經踢職業，吹到新比利，但連美職聯、葡超都踢唔掂，26歲已經踢緊北美非頂級比賽。阿仙奴翼鋒禾確特，初出道又係神童級，16歲幾已經開始幫修咸頓踢波，又快又有腳法，捧成英格蘭新希望一啲都唔出奇，阿仙奴領隊雲格一向自以為買幼齒好有心得，即刻用過千萬鎊，將未夠18歲嘅禾仔收購，講吓講吓已經係10年前嘅事。
小弟一向對英格蘭領隊鶴臣冇咩好感，偏好利物浦熱刺兵，重用名氣少改革，不過今次鶴臣就真係做番一次最啱嘅決定：棄用禾仔。講真除咗深受英超薰陶仲以為英格蘭好勁嘅香港球迷之外，相信冇咩理性球迷會覺得英格蘭係勁旅，喺歐洲充其量二線頭，𠵱家最緊要收起球星心態，希望打爛仔波喺法國有啲奇蹟，禾仔正正係自以為係球星但又冇料嘅英格蘭人，無疑多年受傷患打擊，但連對後衞五五波攔截都心慌慌，唔係避開縮腳就係跳起，真係唔知佢踢國家隊仲有咩貢獻。鶴臣都敢飛起禾仔，唔知雲格今夏又敢唔敢呢？
文：牽牛