周二NBA季後賽，由勒邦占士（LeBron James）領軍嘅騎士喺第三節已經鎖定勝局，最終主場以115:84大勝速龍，喺東岸決賽先拔頭籌。占士咁勁，唔怪得有消息指運動品牌「一剔」上年願意用10億美元（約78億港元）同「大帝」簽賣身契啦！
由於騎士喺第三節已經領先95:67，比賽一早失去懸念，所以占士只係打頭三節；不過佢喺正選上陣嘅28分鐘入面，頭九次起手全部入晒，當中有球入樽仲鋤到個波都變埋形！「大帝」全場13投11中入24分，84.6%嘅命中率更加刷新個人季後賽生涯新高。騎士大勝速龍31分，成為史上第五隊喺季後賽九連勝嘅球隊，不過占士就話：「我哋並冇因為連贏九場而自滿，我哋嘅目標只得一個，就係贏總冠軍！」
據ESPN預計，騎士有78%機會晉級總決賽。而且，美國電視台CBS日前喺網上投票問球迷覺得邊隊可以贏到總冠軍嗰陣，選項更加只得勇士、雷霆、騎士同其他，好似講到速龍唔存在咁；就連多倫多市長莊德利（John Tory）都睇唔過眼，自稱「其他市長」咁寫信去投訴，仲發脾氣話：「如果速龍贏到冠軍，CBS唔該繼續嗌我哋做其他隊！」
「一剔」賣身契值78億
占士最近表現越嚟越好，令唔少球迷都勁好奇，佢喺上年同運動品牌「一剔」簽賣身契嗰陣，「一剔」到底付出咗幾大代價呢？答案喺周二終於揭曉！占士老友M卡達（Maverick Carter）接受《GQ》訪問嗰陣爆料，話呢份合約至少值10億美金！相信「一剔」近年喺波鞋銷量輸畀史堤芬居里（Stephen Curry）代言嘅「UA牌」，係佢哋肯落重本留住占士嘅原因。
