2003年時任廣東省委書記的張德江一連三日訪港，落機第一句就提當年沙士同香港同胞取得勝利，相信經歷過沙士的香港人都會當堂嚇一跳。
當醫護的友人憶述說：「當年唔夠裝備，喺呼吸科嘅醫生才有N95口罩（當年董伯伯老婆戴住做show），護士每日配給一個普通科口罩，我當時實習更只得一個紙口罩。睇住班同事一個二個做勇士，每日抽生死籤去沙士病房照顧病人，就算有細路嘅兩公婆，都只會豁免一個唔使去。當時我印象好深刻，因為冇見過任何醫護人員退縮，所以唔好日日教香港人點愛國，你哋根本冇資格講！」
張德江今次來港無提及香港人要愛國，但就不停推銷一帶一路，仲話有助維護世界和平，不過最值得留意嘅係，張德江重複幾次講要香港把握一帶一路機遇，支持香港為一帶一路建設提供融資服務，講到尾，即係又想撳香港錢！
金管局上個月先講咗，截至去年底本地銀行界與內地相關貸款金額為2.27萬億元，佔總貸款額超過四成，「股壇金手指」謝清海都話內地不良貸款率或高達一成，講咗啲咩，大家應該參透到。
斯郎
本欄逢周四刊出