這晚谷草跑九場夜馬，內檔馬開局順利，頭場由5檔「欖球鑽石」與1檔「大地王者」串Q，第二場頭二名則係3檔「發明小子」及5檔「怡德」。
到了第三場四班2200米大長途，內檔馬繼續威水，蔡約翰馬房之「勁豐裕」排最內的1檔起步，在雷神莫雷拉胯下連捷輕勝而回，單Win及組合獨贏A1，分別派50.5及27.5元，人馬合作亦保持兩戰不敗。呢匹長途氣袋五歲大熟，近四戰三冠一殿，包括兩勝谷草2200米及一捷於田草2200米，加埋總共贏咗6600米，氣量之強可以話係非同凡響。
今場最熱的「歐洲之星」表現失色，一周前贏谷草1800米開齋，這晚續用潘頓再戰谷草，跑長400米，拼盡都只係第五，似乎長力未完全養成。
相反同樣由1800跳上2200米的「威利熱流」，則在田泰安胯下後追入Q，遺憾係此駒連場做二奶，仲未打開在港勝門，第三名「心有靈犀」後上拎到，第四名乃「金秋」，四重彩派一萬三千幾。