回歸前後做過教育局、公務員事務局及工商科技局局長嘅王永平，離開官場後暢論時弊，評彈政府；滙豐前亞太區企業傳訊部主管賀迪文（David Hall），2010年退休後，近日開設網誌《mostlyhongkong.wordpress.com》，轉做博客，亦化身「滙豐平叔」，兩篇網誌都痛陳滙豐問題，直言獅子行難重現昔日光輝，又呼籲佢哋浪子回頭，重投香江懷抱，分拆亞洲上市。
路邊社近日傳聞，David最新身份已被界定為傳媒一類，任何滙豐部門同事若想接觸佢，都要事先通知企業傳訊部！
獅子行係堂堂國際大行，斷估唔會咁小學雞，狙擊一位舊同事兼博客啩，華華當然就此向傳訊部求證。
滙豐發言人回覆話，早於2011至2012年間，因應國際反洗黑及合規管治標準，行內任何部門同事，但凡與傳媒會晤，無論有否款待安排，根據規定都要備案及檢查（record-keeping and checks）。
博客屬於傳媒範圍
咁點樣算係「與傳媒會晤」？與傳媒機構、個人會面或款待當然計算在內，原來有份撰寫網誌嘅博客，都包括在傳媒範圍內喎。
咁明白晒嘞，賀迪文𠵱家係博客，即係傳媒，與之接觸要備案申報，與個人冇關，乃合規制度要求而已。不過，呢類中環羅生門，誰是誰非就無謂深究了。
講番David，1998至2010年，佢出掌滙豐亞太企業傳訊部主管，任內共事過3位主席與5位CEO，熟悉本港同區內大小事務，對獅子行愛之深亦責之切，加上筆力深厚，據聞唔少洋人高層都讚過佢妙筆生花，佢喺網誌狠批滙豐，昔日東家睇咗，唔好受亦好自然！
李華華
mailto:[email protected]