有「航空界李察基爾」之稱嘅國泰（293）前行政總裁湯彥麟（Tony Tyle）有新動向。中國銀行（3988）旗下中銀航空租賃（2588）今日開始招股，佢幫手做獨立非執董，應該係佢第一份獨董工作。
湯彥麟離開國泰後，2011年開始擔任國際航空運輸協會（IATA）行政總裁，做足5年。佢早前先返香港宣佈，打算做到今年中任期屆滿後就離任，話要休息一下。
佢曾經表明，唔再做任何公司嘅行政職位，亦無意重返國泰，但因為有一半時間定居香港，唔介意做與航空相關嘅顧問角色，所以今次中銀航空租賃都好識貨，搵佢做獨董。
其實湯彥麟只係61歲，由1978年已經加入國泰，喺航空界有幾十年經驗，並累積好多人脈，就好似漆黑中嘅螢火蟲一樣，當然唔可以咁易收山喇。