下周三(25日)冇馬跑，不少騎練都會趁空檔出外充電。
本港前季冠軍騎師潘頓就話，初步計劃與太太Nicole和愛女Roxy去泰國，仲問記者有冇好提議，當他聽到好多香港人都會去台灣玩幾天時，潘頓好搞笑咁話：「我都去過一次台灣，就係上次同莫雷拉去完澳洲悉尼客串，適逢香港打八號風球，返港航班途中轉飛台北，被迫滯留當地，未能趕及下午返回沙田參賽呢！」
香港馬圈競爭激烈，本地騎師及二三線洋將難搵馬騎，大家就聽得多，估不到潘頓都大嘆周日(22日)好難搵座騎，他大呻四出搜刮之下，暫時11場都只搵得「凱旋生輝」、「縱橫大地」、「醉必勝」、「瀟灑王子」及「鎏金驃」五匹馬跑。反觀曾表示好欣賞潘頓走位醒目夠聰明，視他為偶像的蔣嘉琦，周日卻暫定有八匹座騎，數目比潘頓還要多。