歐國盃下個月就開波，除咗喺法國會有24隊波為咗爭冠軍，搞到腥風血雨之外，喺香港都有一場「電視仗」！「現在台」同「開心睇」嘅競爭，令朋友變敵人，敵人又變成朋友，就好似一本武俠小說，恩怨情仇乜都有齊，分分鐘好睇過啲波！
噚日兩間電視台分別開記招，我求大俠當然要去了解吓啦！先講「現在台」，佢哋講波佬陣容除咗方栢翹、林慶麟等班底外，最矚目嘅就係馬啟仁（Keyman）復出喇！近年較少講波嘅佢話，其實都係覺得做球迷比較享受，不過之前去完倫敦睇愛隊韋斯咸，要再儲過錢，所以惟有出返嚟講波啦。
東方昇、黃慘盈齊客串
不過，記者會唔覺蔡育瑜喺度，即刻問佢老友曾偉忠（積sir）了解吓，點知積sir話：「有佢冇我！」當然積sir只係講吓笑，佢同大哥瑜不知幾friend，但大哥瑜其實轉投咗「開心睇」。呢對「金猴組合」嚟緊要打對台喇！
金猴組合要拆夥，另一邊就有「敵人變朋友」，講緊嘅係當年經典一撞嘅陳婉婷（牛丸）同鄭兆聰（Ricky），佢哋兩個嚟緊都會效力「開心睇」。其餘評述陣容方面，有何輝、貝可泓等，仲有出名口才好嘅陳偉豪！
牛丸闖法國自嘲「出城」
比完陣容就比製作！「現在台」記者會出現兩個特別嘉賓，就係「毛記電視」嘅東方昇同黃慘盈！佢哋將會喺「現在台」主持特備節目，佢兩個都識啲嘢㗎，東同志就話，歐國盃最想睇中國，可惜冇得睇，雖然中國可憑「一帶一路」去踢歐國盃，但都係畀啲機會歐洲球隊算喇；另外佢話都有睇開波，成日翻睇「馬賽對波圖」咁話。慘盈就話最欣賞「張家輝」，即係美斯！
至於「開心睇」就會派七隊攝製隊去法國直擊，仲請到東方教練牛丸同南華隊長陳偉豪做主持。牛丸話：「未試過喺亞洲以外睇波，今次真係出城睇波！」仲話唔怕冇得唞，因為去法國已經當係放假，最想當然係搵到偶像碧咸合照啦！
