禾確特被英格蘭國家隊棄用，牽牛都讚好，佢隊友辛迪卡索拉喺今季傷多過踢，亦都被西班牙國家隊主帥迪保斯基拒諸門外，喺日前公佈嘅初選名單冇份。不過同人唔同命，大家都係效力阿仙奴，鶴臣就死都要預埋中場韋舒亞，踢到臨收「咧」先傷癒復出，成季踢過一次正選咁大把，鶴臣話唔使講嘢，歐國盃預埋你。
上陣三場、一次正選、合共141分鐘、零入球、零助攻，就係韋舒亞今季喺阿仙奴嘅數據，就已經夠資格入選英格蘭歐國盃大軍，唔知禾仔見到有乜感想。韋舒亞又係另一位年少成名嘅球員，18歲仔就首次代表英格蘭國家隊，不過過咗六年，代表國家隊次數都未夠30次，2014年出戰世盃決賽周，英格蘭分組賽出局，確係冇乜功績可言，今次入選，反映鶴臣用人偏執，同埋英格蘭人才真係冇乜。不過名單出咗之後，亦有人炮轟鶴臣，韋斯咸喺過去一季英超踢得咁好，麥克盧保、安祖卡路爾同米查利安東尼奧真係唔值得有入選機會？
辛迪卡索拉無緣西班牙國家隊，另外兩位效力英超豪門嘅球員都冇份入選西班牙國家隊，就係曼聯嘅桑馬達同車路士嘅迪亞高哥斯達（DC）。佢哋個人能力無疑係唔錯，不過同西班牙國家隊踢法硬係格格不入，尤其係DC，好地地一個巴西人偏要揀轉國籍，點知西班牙國家隊就由徵召呢位入籍兵開始沒落，如果DC繼續等巴西國家隊，話唔定𠵱家已經係森巴鋒線必然正選，照計佢更加啱鄧加咁平實嘅踢法，點都好過36歲嘅奧利華拉啩？
文：何西