張大人日理萬機，百忙之中都抽空嚟香港出席一帶一路論壇，直頭係港人之福啦！為免大家唔記得一帶一路，張大人噚日致辭時一共講咗50次，完勝喺施政報告只講咗42次嘅特首梁振英，張德江果然係梁振英嘅大佬！
八方喺「一帶一路」嘅疲勞轟炸下，竟然聽到張德江講「一路一帶」。冇理由嘅，點會咁㗎？八方回帶重溫，發現佢有4次講咗「一路一帶」，咁究竟係「一帶一路」定「一路一帶」呢？怕且張德江自己都好亂！
開幕儀式上，一眾嘉賓用一個類似電筒嘅裝置照向講台，好有照亮「一路一帶」嘅意味呀！咁新穎式方法，似乎考起張德江同全國政協副主席董建華（圖）。張德江好似唔係好識開電筒，一着咗，就覺得好得意，做完儀式仲周圍照。董伯伯仲搞笑，佢開咗個電筒攞嚟照咗自己幾嘢。既然兩位咁鍾意，不如主辦單位貿發局送個電筒畀佢哋啦。