高貴嘅立法會議員馬逢國，早前喺一個閉門會議上，不滿採訪立法會嘅記者喺會議廳外採訪區開餐，認為咁樣「有礙觀瞻」；又不滿議員喺會議廳外接受訪問時嘈住佢，要求搬走會議廳外嘅「咪兜」。
馬逢國（圖）噚日解釋，咪兜位處會議廳出入口，多間電視台嘅電線放晒喺地下，有次令佢「差啲拗柴」，故建議更改咪兜位置。至於疑似嫌棄記者飯盒一事，佢解釋話見到記者一邊打稿，一邊食飯，有時更因趕住採訪要將飯盒放喺地上，係「唔健康、唔衞生，亦唔係好好睇」，又指記者喺走廊食飯「唔只係觀瞻問題」，好耐之前仲有立法會賓客「問呢啲（記者）係乜人」。
曾主席鼓勵食好西
對於馬逢國嘅建議，立法會主席曾鈺成噚日拒絕支持之餘，仲同喺立法會走廊捱緊快餐嘅記者笑住話：「咁你哋（記者）應該食啲靚啲、好味啲同香啲嘅嘢嘛！」曾鈺成似乎同大部份記者一樣，對馬逢國呢啲膠論冇乜興趣。查實唔少建制派議員都私下嘲笑馬逢國多餘，仲想透過八方叫佢花多啲精神喺其他更須關注嘅問題上仲好啦。