唔少上巿公司管理層都身兼幾職，英皇證券（717）董事總經理楊玳詩（Daisy）亦都唔例外。佢除咗係上巿公司話事人，仲喺舊年12月獲選為證券商協會主席，今年初正式履新。
聽Daisy講，自從做咗協會主席之後，簡直係忙上加忙，事關要一邊打理英皇證券盤生意之外，平時又要與同業開會、出席飯局，仲要代表業界同立法會議員、證監會等會面，真係分身都唔掂。
不過，Daisy話可以定時同政府與監管機構見面都係好事，業界有乜新idea都能夠即時反映咁話。
有趣嘅係，雖然Daisy已經為協會做緊嘢，但原來仲未進行就職儀式。佢話，因為協會成員都好忙，好難就時間，所以要到今年8月先舉行就職禮。主席一職每年都會重選，最多做3年，問到有冇信心冧莊，Daisy就話好有信心呀！