今屆歐國盃球迷有福喇，有兩個台直播，有競爭先有進步，唔再係一台獨家，電視台就要比價錢比製作，肯定係球迷之福。
「現在台」除咗有歐國盃直播權外，仲有「百周年美洲盃」直播權，佢哋亦都推出咗《歐國盃.美洲盃通行證》，畀700蚊可以睇呢兩項大賽。美洲盃會喺650頻道度播，而歐國盃就會喺651頻道。選擇「現在台」嘅好處，係睇兩項大賽都有自選服務，隨時重溫所有賽事；用佢哋個app，攞住電話或者平板電腦都可以去到邊睇到邊。當然，有唔少球迷都好想佢哋會放啲重點賽事喺免費台度播！
至於「開心睇」最大賣點，相信就係價錢喇！睇晒51場歐國盃價值249蚊，想要多個4K盒仔，畀夠599蚊就包埋！平過「現在台」一大截。不過，球迷始終最重視嘅係直播質素。「開心睇」喺歐國盃仍然會用互聯網製播，呢樣嘢一直都惹人詬病。我求大俠之前喺堆填區睇英足盃，半場都試過冇咗畫面三次，睇嚟「開心睇」真係要想辦法搞搞佢！
不過多啲競爭，相信都係球迷得益。雖然「開心睇」嘅播波質素有待改善，亦因為「紅色背景」令人反感，但佢哋的確有啲誠意。今次派七隊攝製隊去法國，據悉要使成千萬港紙㗎。