講到明唔會放過梁特嘅前人大代表「飛天朱」朱幼麟（圖），上星期效法特首女梁頌昕咁大頭蝦喺機場唔見行李，不過就冇梁家咁好彩，冇人代佢拎入禁區。飛天朱近日外遊返港，即刻搵咗幾間傳媒講番件事，佢話呢次親身經歷，證明特權係梁家獨有，話保安局、民航處同機管局食死貓為梁家孭鑊。
飛天朱話，涉事幾位機場同國泰員工事後隱形，亦懷疑佢哋受壓，含冤受屈冇得講真話。佢話會繼續跟進，有信心可以幫幾位不幸牽涉事件嘅人攞番個公道。
今次人大委員長張德江嘅保安咁大陣仗，佢相信係出自梁特指示，唔係委員長意願，因為梁特份人最叻擦鞋，「保安理由封獅子山就簡直係荒謬同笑話。」佢記得當年英國皇儲查理斯王子訪港，都唔使咁大陣仗，自己獲王子邀請出席酒會，請柬唔會有確認身份回條，就算冇帶請柬都入到場，更唔會封路擾民啦。