眾所周知，耀才（1428）主席葉茂林好撐港交所（388）行政總裁李小加，小加好多新猷，佢都表態贊成，今年3月初，耀才仲豪掟1.7億元掃入100萬股港交所。不過喺全場憧憬深港通開車之際，耀才反而揸貨短短兩個月就全數沽清，賬面賺1,560萬元就閃人，莫非有玄機？
據耀才公告，公司今年3月以均價172.5元掃入港交所，當時講明係睇中互聯互通機遇，不過深港直通車未開，公司喺4月29日與5月16日就已經分別賣走50萬股，均價188.1元，賬面賺9%。
葉茂林噚日話，沽貨唔代表睇淡，強調長線睇好中港股市，只係「有得賺唔通唔賺咩，睇淡我就反手沽空啦」。
查實葉茂林的確好鍾意炒港交所，好似舊年「港股大時代」時，佢私人以每股約260元高位沽咗75萬股港交所，兩個月左右就勁賺6,000萬元。