一度闊別18年嘅荔園遊樂場，去年暑假以期間限定方式「荔園Super Summer」重現中環新海濱，為期70日。荔園有限公司主席邱達根講過，會總結經驗，先決定繼唔繼續搞。八方噚日收到邀請，下星期一有關方面會開記者會公佈荔園活動詳情，即係話，荔園又返嚟啦！
荔園發言人唔肯透露荔園舉辦日期同地點等詳情，但八方聽聞會繼續喺暑假搞，據知仲移師去亞洲博覽館。不過開心還開心，去年雖然有差唔多120萬人次入場，但由於唔收入場費，主辦單位曾經擔心收唔番成本。而今年如果真係移師亞博，遠咁多，又會唔會影響人流呢？不過如果遊戲創新好玩，都會吸引到市民去嘅，因為亞博嘅部份活動人流都唔錯㗎。唔知大家今年又會唔會再入場，支持呢份本土情懷呢？