現今資訊渠道太多，企業搞宣傳campaign都要扭盡六壬，好以星展香港，除早前搵來一田前行政總裁莊偉忠拍短片，新近連開記者會，都要高層與同事以演話劇形式進行，認真係出盡法寶。
星展香港最近成為全港首間接受中小企，以網上視像系統完成開戶嘅銀行，銀行噚日舉行記者會，事前動員唔少同事拍短片介紹新服務，會上又真人上演茶餐廳老闆開戶嘅小短劇，有齊佈景，兼有奶茶、蛋撻供應，唔講以為星展開埋茶餐廳。
扮演用視像開戶嘅茶餐廳老闆，係星展見習生，演技唔錯，星展香港董事總經理兼企業及機構銀行總監張建生（Alex）就粉墨登場，飾演「資深銀行經理」，呢個角色當然難佢唔到喇。
Alex話，希望藉此模式將茶餐廳傳統文化，同銀行新科技結合，搞搞新意思。