今年係鄉議局成立90周年大日子，鄉議局當然要發大嚟搞喇﹗佢哋打算下月11日喺沙田馬場舉辦大型慶回歸暨90周年萬人綜藝嘉年華會，講到萬人咁犀利，難怪鄉議局副主席張學明大為緊張，噚日專登向27鄉吹雞，提醒佢哋動員多啲人去。
鄉議局噚日開執委會時提到，成功邀請咗梁特出席嘉年華會，單係呢點經已令成個嘉年華吸引力大減，八方提議，改為呼籲市民去請願、抗議，相信好易湊夠萬人。
此外，鄉議局亦通過批100萬元鄉議局研究中心，作為今年度第一期經費。呢個研究中心嘅主任薛浩然，就係鄉議局主席劉業強姑丈。實情前排鄉議局傾批錢畀研究中心嗰陣，唔少人都對薛浩然有微言，張學明話，呢次雖然會繼續批錢，但係鄉議局亦會出題目畀中心研究，唔再係中心自己話事，睇嚟薛浩然要醒定喇。