舊年夏天同曼聯續約四年嘅西班牙鋼門迪基亞，原來同領隊雲高爾勁唔妥，而且仲表態話如果雲高爾唔走就佢走！話時話，迪基亞同摩連奴嘅經理人都係文迪斯，唔知係咪文迪斯出手叫迪基亞做嘢，等摩佬可以盡快入「魔」呢？
英國《每日郵報》指，連續三年當選紅魔球迷最佳球員嘅迪基亞，原來勁唔鍾意領隊雲高爾，仲話球隊成績唔好，完全係呢個荷蘭老帥嘅責任；而佢更加講到明，如果雲高爾今夏唔走，佢就走人。消息又指，如果曼聯畀雲高爾完成埋最後一年合約，皇家馬德里就會即刻出手，用4,000萬鎊（約4.5億港元）幫迪基亞贖身。不過，由於迪基亞嘅經理人都係文迪斯，所以亦都有江湖傳聞指，係文迪斯喺背後搞搞震，指使迪基亞出手，等摩佬可以喺今夏成功入主奧脫福，做紅魔揸弗人。
傳兩年約誘伊巴加盟
另外，仲有指紅魔已經正式邀請今夏同法甲巴黎聖日耳門約滿而回復自由身嘅34歲瑞典國腳前鋒伊巴謙莫域加盟，仲開咗一年生約同一年死約畀佢。此外，將安全演習嗰陣用嘅道具炸彈漏喺奧脫福而搞到周日曼聯迎般尼茅夫場英超要取消嘅保安公司，佢哋老細日前出嚟道歉。