民主黨中西區區議員許智峯（圖）早排因不滿政府計劃拆毀西環加多近街臨時花園，用塊地嚟起私樓，於是同區內居民發起「保衞加園．留守30日」，過去30日每晚都喺花園紮營抗議，到噚日先結束，佢話呢30日瞓公園真係令佢感受良多，要餵蚊唔在講，仲連俾水浸都試過。
回顧30日紮營，阿峯話最辛苦係畀蚊咬，最高峯全身有百幾處畀蚊針，亦試過紅雨時個營架倒塌兼水浸，不過佢話佔中時喺金鐘瞓過街，唔算乜嘢。
或再到城規會留守
而且仲不時有街坊送食物嚟打氣，真係好多謝佢哋，而今次行動亦成功令更多人留意政府拆毀公園問題，聯繫到好多街坊、傘兵同民間組織，而佢亦唔會就此罷休，稍後城規會審議有關項目時會再行動，不排除會去城規會再留守抗議。
講完瞓公園，阿峯又話早排喺黨內競逐出選港島立會候選人成功，原來亦「呵番」落選的黨友莊榮輝，噚日仲同莊榮輝、楊森以及一班中西區黨友食早餐，相信一旦出選，黨內都會一致對外，唔擔心樁腳問題，仲話初步構思搵現任議員單仲偕，同埋該黨兩名女將楊小壁、張啟昕一齊合組名單，希望畀到大家年輕一代為主嘅感覺。