上市公司每逢召開股東會，一定準備茶點、餅卡或點心券（即場換盒點心）畀小股東享用，內房股碧桂園（2007）對小股東都唔錯，噚日開股東會，準備定900張、每張價值50元嘅餅卡，難怪現場大約有300名小股東出席，都算墟冚。
唔參與其中，都唔知碧桂園有咁多小股東畀面出席股東會，公司專登喺金鐘一間五星級酒店包咗兩個大廳，先容納到300人。
不過，佢哋未必全部係開心股東，一位小股東張生同華華呻，嚟咗都聽唔明公司管理層講乜，只係近年內房股表現麻麻，嚟股東會，志在見吓碧桂園主席楊國強，知道公司冇事。對於現場有幾百名小股東，佢話見慣不怪，指如果隻股爭氣啲，大家就唔會特登嚟食番餐補數喇。呢番小股東嘅心事，楊國強應該要知喎。