有一種童年，叫做屋邨。鄺俊宇喺元朗郎屏邨長大，喺朗屏邨讀小學、做義工，最終喺呢條屋邨做埋區議員。鄺俊宇嘅文字風靡萬千少女少男，究竟佢係幾時開始寫呢類情情塔塔嘅文章呢？鄺俊宇話，喺2012年被稱為「世界末日」前一日，忽發其想，打算留下一段說話，結果佢寫咗《WhatsApp的最後上線時間》上facebook，點知末日不成，第二日瞓醒竟然有一萬個shares，咁就開始佢嘅寫作生涯：「嗰時先發覺，原來自己寫嘢，係有人願意睇。」
收過萬封「情信」
90年代，係中學男生髮型「分界」嘅世代。鄺俊宇讀天水圍張煊昌中學，相中嘅佢，走在當時潮流尖端，來一個「六四分界」。看盡時下戀愛模式嘅鄺俊宇，中學都有拍拖㗎，但就拒絕透露家吓仲有冇同呢位初戀聯絡。佢話自己談戀愛時，絕非如自己筆下嘅浪漫，而係老套，但又唔係老套到「寫情信」嗰款喎。
鄺俊宇除咗靠愛情潮文一寫成名外，佢讀中學時打辯論比賽，去到最後一場，學校先派佢出賽，點知一出就攞埋「最佳辯論員」。
鄺俊宇以「鄺俊宇體」準確刻畫少男少女嘅發情期，何解今年33歲嘅佢，有咁多靈感？原來佢嘅inbox有過萬封「情信」，人人當佢「樹洞」咁向佢分享一段又一段嘅愛情，所以佢點會唔明白呢？「數量仲多過我議員辦事處收嘅求助信。」