聲稱代表傳媒業嘅立法會「體育、演藝、文化及出版界」議員馬逢國，噚日喺立法會行政管理委員會閉門會議上，提及佢嘅「選民」、即係班駐守立法會嘅記者。不過八方聽聞馬議員唔係為「選民」爭取利益，而係想趕走佢哋，不滿立法會畀記者喺會議廳外食飯，認為「有礙觀瞻」、「烏煙瘴氣」、「搞到好大陣味」！
指咪兜篤眼篤鼻求搬走
八方打探到馬逢國喺會上投訴記者每逢大會時，就喺會議廳外嘅工作枱上一邊採訪、一邊食飯，有損會議廳外嘅環境，直言「成何體統」、「有礙觀瞻」、「搞到好大陣味！好似大牌檔咁！」佢話記者應到其他地方食飯。其實不少議員為咗同記者打好關係，有時會喺走廊同記者一齊食飯、亦有官員喺走廊派西餅、有剛生仔嘅保皇黨議員甚至喺走廊擺檔派薑醋㖭。
除咗投訴記者，馬逢國又不滿放滿錄音器材嘅「咪兜」篤眼篤鼻，喺會上批評「咪兜」變成議員互相攻擊嘅政治工具，要求搬走，建議重新規劃議員受訪同「咪兜」位置。
象哥不滿記者瞓覺
不過八方聽聞會上建制派議員都頂唔順佢咁刻薄，叫佢應該先諗吓有乜解決辦法先講。民建聯「象哥」黃定光亦喺會上不滿有記者喺另一層會議廳外瞓覺，力斥有記者伸長腳會「棘親」佢。呢番言論，出自成日開會時瞓覺嘅黃定光特別諷刺。
八方打畀馬逢國問個究竟，佢好惡話會議唔係公開，仲要求八方提供消息來源：「我係唔會comment，邊個同你咁講？」記協主席岑倚蘭就話，記者有工作需要先至要喺立法會走廊食飯，批評馬逢國帶頭傷害業界利益。岑倚蘭又話唔少議員平日嘅表現都有礙觀瞻，都繼續存在，呼籲議員唔應該覺得自己尊貴無比。
馬逢國與李八方對答
李：你係咪喺行管會上講過，記者唔好再喺走廊食飯，認為咁樣係有礙觀瞻？
馬：行管會嘅嘢，我哋唔會對外講，我係唔會comment，邊個同你咁講？
李：我不會披露我消息來源。
馬：我唔comment啦總之，行管會嘅嘢我哋唔會對外講。
李：但你係咪承認你有咁講過？
馬：我唔comment就即係我唔comment啦。
李：其實記者喺走廊食飯，有冇問題？
馬：我唔comment呀。
李：如果我只係就一般而言問你呢？
馬：我冇嘢講。
李：你覺得咪兜係咪要搬走？
馬：我唔會comment喺行管會所講嘅嘢。
李：若我不是就着行管會而問你呢？只是問你一般意見。
馬：我唔準備comment呢樣嘢囉。
李：你係咪唔太尊重傳媒呢個職業？你其實代表傳媒呢個界別。
馬：我冇嘢comment呀。
李八方
mailto:[email protected]