YHA美荷樓青年旅舍面世近3年，轄下嘅呼吸咖啡館已結業，改由四十一冰室繼續營運。四十一冰室嘅命名來自石硤尾邨美荷樓41座，新餐廳比以往更着重懷舊特色，以九因歌、80年代垃圾蟲、七巧板、鬼腳圖、Yes Card等懷舊物品做裝飾品（左圖），客人可以玩掛喺牆身嘅天下太平、井字過三關等小玩意。
除咗懷舊，新餐廳加插「搵食箒」、「正呀喂」等潮語作牆身裝飾，仲有5名本地藝術家嘅畫作。食物方面，新餐廳新增fusion菜和素食者之選，包括特色豆腐漢堡、乾果杏仁茶等，所有食物不超過150元。YHA美荷樓青旅總經理范達廉話，裝修主題係配合深水埗越來越重嘅文化藝術氣息，令來自世界各地入住嘅客人更了解本土文化，裝修開支用咗6位數，YHA覺得投資係值得。
