唔經唔覺，收集硬幣嘅神沙車，誕生差唔多兩周年，圍繞咗香港18區好多個圈。金管局話，嚟緊兩年會繼續吞市民手中嘅神沙，維持兩部車不變。
神沙車喺前年9月正式投入運作，咁耐以嚟，總共吞咗1.5億個硬幣，總面值差唔多1.7億元，有18萬人唔要神沙，將佢哋換成鈔票、幫八達通增值，又或者捐畀公益金。
金管局話，神沙車最高紀錄曾經試過一日啃58萬個硬幣，搞到神沙車爆咗錶，要解款員提早將筆錢運走先可以繼續運作。
嚟緊神沙車會繼續運行多兩年，因為有助回收大家唔用嘅硬幣，同時金管局又唔使鑄造太多硬幣，其實都慳到啲成本。好多人會問，究竟硬幣點解仲有需要，之前有金管局高層曾經解畫，話好多商舖仲要1毫子，點解呢？有專家話，部份師奶覺得商品賣9.9元，睇落平過賣10蚊好多！