今個星期五就會過28歲生日嘅香港壁球女將陳浩鈴，噚日喺台北返香港時竟然見到偶像何韻詩，可以話係最難忘嘅生日禮物！上周六喺台北團體亞錦賽攞到銅牌嘅浩鈴，因為獲航空公司升級上商務位，咁啱何韻詩坐佢隔籬，浩鈴話：「我由細到大都鍾意聽佢嘅歌，坐我隔離簡直係once in a life time（一生人一次），起飛前已經同佢合照咗，後來想攞獎牌同佢影多張，最後都係厚住面皮影咗，佢仲攞住個牌，臨落機同我講『拜拜』同『加油』，真係好開心。」噚日一齊返港仲有攞到男團亞軍嘅香港男子壁球隊，包括因肩傷打唔到亞錦賽嘅歐鎮銘，佢前晚喺台北亞錦賽晚宴獲領「年度最佳男球員」獎，身旁為佢家姐、香港一姐歐詠芝。