碧桂園（2007）預備大量餅卡畀小股東，另一邊廂，會德豐（020）主席吳宗權噚日喺股東會，俾一位小股東問到口啞啞，原因就係點心券每人限攞一張。話說股東會臨近尾聲，有位婆婆突然發難，起身質問管理層，「點解畀多張券我（換點心）都唔得？」佢話買咗會德豐好多年，有兩張Proxy（委託書），但班職員又唔畀攞多張點心券，「你（管理層）話係咪好有趣？」
吳宗權應冇留意呢啲事，「被訓話」嗰陣全程微笑專心聽，答咗句「我都覺得幾有趣」，之後用眼神搵人解圍。
在旁有位職員即刻幫手解釋，指多年來都唔係計Proxy派點心券，而係計一個「活生生嘅人」嚟到，就每人一張。呢位婆婆當然唔多滿意，喺台下繼續鬧。吳宗權冇理佢，繼續開會，讀埋議程，會後仲急急腳咁走，可能怕俾小股東捉住，要佢交點心券數啩。