中環在線:中科老闆發物流夢 - 李華華

中環在線:
中科老闆發物流夢 - 李華華

陳偉星唔係好多人識,查實佢係內地call的App「快的」創辦人,阿里巴巴入股投資快的後,2014年與另一應用程式滴滴打車「開戰」鬥燒錢搶客,一年之後,雙方講和,喺情人節公佈合併,陳偉星低調退出由佢一手湊大嘅快的。
但鍾意創業嘅人,一有新諗法就會身痕,想做另一番大事。早前陳偉星就入股中科礦業(985),成為單一大股東兼執董,再透過公司先後買入「第一物流」92%同埋「快貨運」兩成股權,睇嚟係想借中科礦業集資,再創另一番互聯網物流事業。
有「快的創辦人」嘅光環,到底陳偉星會點搞間公司呢?佢竟然自潑冷水,話「未來兩至三年不以盈利為目標,不會短期追求盈利」。公司發展唔考慮收支平衡,以擴大規模為主喎。至於佢同阿里主席馬雲嘅關係,佢就話,平時唔會同對方傾生意,只會「胡說八道,只談吃喝玩樂」。