巴塞隆拿有驚無險蟬聯今季西甲冠軍,贏得咁辛苦,球會未等全部西甲比賽完成,就急不及待喺當地周日下晝進行勝利巡遊。巴塞職球員浩浩蕩蕩坐住大巴喺市內行走,沿途接受成千上萬嘅球迷歡呼。不過,行咗一輪都唔見美斯,匿埋咗成粒鐘佢先蒲頭。
同碧基匿喺巴士醫肚
巴塞喺上周六西甲煞科戰作客大勝CF格蘭納達3:0,一分力壓死對頭皇家馬德里蟬聯冠軍,大軍衣錦榮歸後,翌日喺當地時間大約下晝六點展開勝利巡遊,當時連剩返幾場西甲煞科戰都仲未開波。成班巴塞球員開開心心影吓相,上大巴開始巡遊,沿路梗有大批球迷夾道歡迎。不過,行咗好耐一直都唔見美斯蹤影,唔通對於今季入波數目唔及隊友蘇亞雷斯,嬲咗唔出現?當時亦有傳話美斯因為胃痛走咗。
遊咗大約一個鐘之後,美斯終於出現,行上巴士上層同球迷揮手;據講佢之前消失咗係因為同碧基喺下層一齊食嘢,醫好個肚先出嚟。其實美斯喺巴塞嘅地位邊有咁易被取代,贏埋今季西甲,佢已經追平咗前輩沙維保持嘅八奪聯賽冠軍呢個球會紀錄。
至於今季負面新聞唔少嘅尼馬,俾人話場上表現下滑,又傳跳草裙舞要過檔皇馬;不過,佢喺巡遊嗰陣顯得好開心,仲同阿蘇玩騎膊馬。記得上年尼馬喺巴塞贏三冠王巡遊嗰陣,問球迷拎漢堡包食,到今年都未戒得甩鋪漢堡癮,又見佢揸住個包,但就唔知佢係問球迷攞定自己買咯。
安歷基念舊賀希杭護級
另外,教練安歷基上任兩年就贏兩次西甲,雖然今季歐聯喺八強止步,但成績已經令人相當滿意,而且佢哋仲叫緊另一鋪糊,嚟緊周日會喺西班牙盃決賽鬥西維爾,爭取衞冕。安歷基喺巡遊嗰陣睇落好高興,其實暗藏憂慮,因為當時佢母會希杭場煞科戰仲未開波,結果賽前排18位嘅希杭喺主場以2:0擊敗維拉利爾,成功逃出生天。安歷基返屋企即刻着番件希杭球衣,影相放上twitter,恭賀佢出身地下季可以留喺西甲。