富翁W已經退休，只係做幾間上市公司獨立非執董，已經夠佢忙，現在做上市公司INED，同樣要負上執行董事之法律責任，不能以我唔知道為公司違規時嘅辯護理由。前星期左丁山結束顧問公司業務，清理舊文件剪報、書籍，發現幾份十五、六年前嘅簽署文件，拿來一看，就係INED嘅Liability Statement，左丁山曾經三次做INED，因講說話太多，開董事會時有話直說，令一啲人尷尬，又要核數師記錄在案，寫人所不喜，於是自己醒目，以私人理由辭職，現在翻睇當時所簽署之責任聲明，猶自一額汗，好彩未曾出過事，於是將所有文件送入碎紙機，以後不會再記得。
所以好佩服富翁W仲咁好心機去為上市公司服務，老實講，啲董事袍金與心理負擔及一把年紀比較起嚟，係唔相稱嘅，無謂攞苦嚟辛吖，不過富翁W話當年人地幫過佢，佢又幫過人，有咁多年交情，推唔甩。正由於佢嘅名字印在公司年報，大銀行之財富管理人員幾容易在存戶名字中搵得到，立即打電話搵佢：「W董事先生，我地發覺你戶口有唔少錢，唔見郁動，我地想update你啲個人資料，然後向你提供一個財富策劃意見書，你有冇時間呀？」W先生一聽就知道對方要推銷產品，即刻話唔使，但客戶經理死纏爛打，W先生卒之勉為其難，到銀行作面對面傾談。果然，對方推銷金融產品，結構性產品……務求將佢嘅戶口存款郁動一下，以求收取費用。W先生聽到煩晒，竟然想話撤銷戶口。呢日飯局上講起，老友記基金K話：「唔好close戶口呀，以後好難開得番㗎，銀行對新戶口審查極嚴，否則會被金管局抽秤，你咪提走大部份錢，留低最低結餘一百萬元，維持番個戶口就算啦！」會計C加把口：「將來歐盟會推出CRS（Common Reporting Standard）中國已經簽署咗協議，承諾在中國境內推行，包括香港在內，即係話目前美國人及綠卡持有人嘅銀行戶口受FATCA監控，將來歐盟護照持有人嘅戶口，就受CRS監控，開新戶口更加難，大家現有銀行戶口，不可輕言放棄！」各國政府冇錢，驚死國民逃稅，逼銀行收緊戶口監控，令銀行合規成本大增，幾難容忍停留不動嘅存款戶口，係要諗方法從中賺取費用，於是就產生富翁W與銀行客戶經理嘅「磨爛蓆」之故事。唔怪得話，銀行難做，銀行股若無高息派，買唔過。